GHITI

Il progjet Ghiti al nas cun chê di educâ cul divertiment i fruts de fasse di etât dai 3 ai 10 agns par che si usin al bilinguisim e ae lenghe furlane, intant che i gjenitôrs si informin e a cjapin cussience dai vantaçs di une educazion bilengâl.
Il contest di ûs di “Ghiti” al à tant che riferiment il gjenitôr che al dopre il smartphone o il tablet par intratignî un frut in mobilitât. Invezit di lassâlu di bessôl intun contest là che al è esponût a contignûts che no son bogns par lui, al rive a visionâ e a zuiâ cun materiâl di cualitât, che al è stât prime verificât e staronzât.
Chest progjet nol è però une “net nanny”; cun di fat, al è il sît che al ferme la vision dai cartons animâts ogni 30 minûts, par che il frut nol passi masse timp denant dal schermi.

Liniis vuide

Il sît al va daûr di criteris di leibilitât, di acessibilitât pal daltonisim e contrast alt, di inclusivitât e al è mobile first, cun pocjis e facilis interazions e une interface cence masse inputs visîfs. Il menù si sposte, par che i çampins a rivedin a doprâle cence disvantaçs. I tescj a son scrits cuntune forme neutre e il plui pussibil inclusive, cun chê di stiçâ il zûc e lis micro interazions. E je ancje une “modalitât esplorazion” che e mostre, se si tocje il schermi cul dêt o se si passe sore cul mouse, che il stes test al è a disposizion sedi par talian che par furlan. In cheste sezion “par i grancj”, i gjenitôrs a puedin lâ insot a tematichis e a sugjestions par ogni contignût, di mût di verificâ ancje la idoneitât par fasse anagrafiche e par argoment.